Бүгін Жетісай ауданы әкімдігінің үлкен мәжіліс залында ауыл шаруашылығы саласын несиелендіру бойынша жиын өтті. Жиынға ауданның жеке кәсіпкерлері, шаруа қожалықтарының төрағалары және ауыл шаруашылығы саласының мамандары қатысты. Кездесуді Жетісай ауданы кәсіпкерлік бөлімінің басшысы Данияр Толыбаев жүргізді. 

Елбасы Нұрсұлтан Назарбаев кезекті Жолдауында «Қарапайым заттар экономикасын» қалыптастыруымыз керектігі жөнінде айтқан-ды. «Қарапайым заттар экономикасын» қалыптастыру дегеніміз – бірінші кезекте сырттан келетін заттар санын азайтып, керісінше халық күнделікті тұтынатын азық-түлік, киім-кешек секілді тұрмыстық заттарды өз елімізде өндіру. Яғни сол арқылы тұрғындарды жұмыспен қамтып, тұрмысын жақсартуға жол ашу. Осыған орай бүгінде ауданда тиісті шаралар қолға алынып, жұмыстар атқарылуда.